काठमाडौं– अभिनेत्रीको रुपमा मनोरञ्जन क्षेत्रमा पाइला राखेकी पवित्रा आचार्य आजको मितिसम्म आइपुग्दा प्रि–प्रोडक्सनको चरणमा रहेको एउटा फिल्मको ‘काष्टिङ डाइरेक्टर’ को रुपमा अनुवन्धित भएको खबर केही समयदेखि चर्चामा छ ।
वर्षौँअघि नेपाली फिल्म ‘विजयपथ’ बाट रजतपटमा डेब्यू गरेकी यी अभिनेत्रीले उक्त फिल्मका लागि निखिल उप्रेती, सुशील क्षेत्री, सञ्चिता लुइँटेलजस्ता कलाकारसंग स्क्रिन शेयर गरेकी थिइन् ।
त्यसपछि अभिनेत्री आचार्यले अभिनेता राजेश हमालसँग फिल्म ‘राजनीति’ मा अभिनय गरिन् । यो फिल्ममा गायिका कोमल वलीले पनि अभिनय गरेकी थिइन् । अभिनेत्री आचार्यको तेस्रो फिल्म ‘आवेग’ थियो, जसमा अभिनेता आर्यन सिग्देल मुख्य भूमिकामा थिए ।
प्रायः सबै फिल्ममा अनुभवी कलाकार तथा टीमसंग सहकार्य गरेकी अनिभेत्री आचार्य सानै उमेरदेखि नृत्यमा पारंगत थिइन् । अभिनयका साथै नृत्य विधालाई पनि उनले करियर बनाउने उदेश्यले एक दशक अघिदेखि नै उनी नृत्य निर्देशक अर्थात कोरियोग्राफरको रुपमा समेत काम गर्न थालिन् ।
गायिका कोमल वलीको तीज गीतबाट नृत्य निर्देशक बनेकी आचार्यले त्यसयता दर्जनौं गीतका म्युजिक भिडियोमा कोरियोग्राफी गरेकी छिन् । आचार्यको कोरियोग्राफीमा करिश्मा मानन्धर, अनुप विक्रम शाही, आँचल शर्मा, सलोन बस्नेत, अनु शाह, नीता ढुङ्गाना आदि कलाकारले कम्मर मर्काइसकेका छन् । त्यसो त यी अभिनेत्रीले कमाण्डर तथा मेला फिल्मका गीतमासमेत कोरियोग्राफी गरेकी छिन् ।
मोडलिङमा समेत उत्तिकै सक्रिय आचार्यलाई अहिले ‘पावला’ नामबाट पनि चिनिन्छ । एउटा विदेशी गीतको म्युजिक भिडियोको निर्देशन तथा कोरियोग्राफीपछि उनले आफूलाई ‘पावला’ नाममार्फत चिनाएकी हुन् ।
यीनै अभिनेत्री तथा कोरियोग्राफर आचार्यले अब भने काष्टिङ डाइरेक्टरको रुपमा आफ्नो परिचयलाई थप उचाइ प्रदान गर्ने भएकी छिन् ।
नेपाल चलचित्र कलाकार संघका महासचिवसमेत रहेका सविन श्रेष्ठको निर्माणाधिन फिलम ‘कश्यप’ मा उनी कास्टिङ डाइरेक्टरको रुपमा अनुवन्धित भएकी हुन् ।
नेपाल चलचित्र कलाकार संघको केन्द्रिय सह–कोषाध्यक्षको रुपमा सक्रिय अभिनेत्री, कोरियोग्राफर तथा काष्टिङ डाइरेक्टर आचार्य सामाजिक कार्यमा समेत उत्तिकै सक्रिय रहँदै आएकी छिन् ।
