यूट्युवका शीर्षकहरू हेर्ने हो भने अहो बबालै फिल्म पो रहेछ ‘मोहर’ भन्ने लाग्न सक्छ। अनि युट्युबका चल्तीका फिल्म रिभ्युअरदेखि सिकारुसम्म पनि पल शाहको अहिलेसम्मकै बबाल फिल्म भनेर प्रशंसा गरेर थाकिरहेका छैनन्। टिकटक हेर्ने हो भने पनि पुरै समाज मोहरको पात्रहरूसँग धुरुधुरु रोइरहे जस्तै भान पर्न सक्छ। हो, फिल्म हेरेकाहरू धरधर रोइरहेका छन्। तर फिल्मको कथाले छोएर, अथवा कलाकारको अभिनय हेरेर हैन, फिल्म हेर्दा खर्च भएको पैसा र समय सम्झिएर हो।
कथा नयाँ हैन, नेपालको पश्चिमाञ्चल क्षेत्रमा कुनै समय प्रचलनमा रहेको देउकी प्रथामाथि नै हो। छोरा जन्मियो भने गाउँमा राजा भएर राज गर्छ, छोरी जन्मिई भने कुलको इज्जतका लागि बलि दिइन्छ भन्ने कथामा नै फिल्म ‘मोहर’ बनेको छ। शुक्रवारबाट प्रदर्शनमा आएको फिल्मले परम्परामा मात्रै हैन अहिले अहिले पनि खानदानी घरहरूमा छोरीलाई बलि चढाउने गरेको कथा भन्ने प्रयास गर्छ।
