काठमाडौं । प्रतिनिधिसभा निर्वाचनका लागि नेपाली कम्युनिस्ट पार्टी (नेकपा) ले युवा नेता विशाल लामा तामाङलाई काठमाडौं निर्वाचन क्षेत्र नम्बर–८ बाट उम्मेदवारका रूपमा सिफारिस गरेको छ । काठमाडौं–८ अन्तर्गतका स्थानीय पार्टी कमिटीहरूले तामाङलाई उम्मेदवार बनाउने निर्णय गर्दै पार्टी केन्द्रमा सिफारिस गरेका हुन् ।
साविक नेकपा (एकीकृत समाजवादी) निकट युवा संगठन युवा संघ नेपालका केन्द्रीय उपमहासचिव तथा बागमती प्रदेश इन्चार्ज रहिसकेका तामाङ उपत्यकामा सक्रिय र परिचित युवा नेताका रूपमा चिनिन्छन् ।
युवा आन्दोलनबाट राजनीतिमा उदाएका तामाङ एमाले हुँदै नेकपा (एकीकृत समाजवादी) र पछि एकतामार्फत नेकपामा आवद्ध भएका हुन् । शहरी क्षेत्रमा युवापुस्ताको नेतृत्वको आवश्यकता बढ्दै गएको उल्लेख गर्दै उनले पुरानो पुस्ताका नेताहरूलाई अभिभावकका रूपमा सम्मान गर्दै निर्वाचनमा होमिने बताएका छन्।
नेता तामाङ नेकपाका वरिष्ठ नेता झलनाथ खनाल निकट मानिन्छन्।
