दसैंको फूलपातीमा प्रदर्शन तयारीमा रहेको फिल्म ‘हरिबहादुरको जुत्ता’ को पहिलो गीत सार्वजनिक भएको छ।
सोमबार सार्वजनिक (बेला बितेसी)बोलको गीतमा प्रकाश सपुत र समीक्षा अधिकारीको स्वर छ। यसको भिडिओमा फिल्मका मुख्य कलाकार प्रकाश सपुत र स्वस्तिमा खड्काको नृत्य हेर्न सकिन्छ।
रोमान्टिक शैलीको यस गीतको शब्द तथा संगीत प्रकाश स्वयंमको हो भने श्यामस्वेत रसाईलीले मिस्किङ र मास्टरिङ गरेका छन्।
मौलिक लोक भाकाको स्वाद पाइने गीतको भिडिओलाई मौसम हिमालीले कोरियोग्राफी गरेका हुन्। भिडिओमा प्रकाश र स्वस्तिमाको मनमोहक नृत्य र रोमान्टिक केमेस्ट्री देख्न सकिन्छ। भिडिओलाई पवन सुस्लिङले खिचेका हुन्।
दीपेन्द्र के। खनाल निर्देशित ‘हरिबहादुरको जुत्ता’ मा वरिष्ठ अभिनेता हरिवंश आचार्य ‘हरिबहादुर’ को शीर्ष भूमिकामा छन्। साथमा प्रकाश र स्वस्तिमासहित प्रियंका कार्की, हरिहर शर्मा, दिव्य देव, किरण केसी, राजाराम पौडेल, दिनेश काफ्ले, सिता न्यौपाने, कमलमणि नेपाललगायत कलाकारहरूको अभिनय छ।
एसएम मोसन पिक्चर्सको ब्यानरमा सरोज ओली र मोहितवंश आचार्यले यस फिल्मको निर्माण गरेका हुन्। फिल्मको छायांकन कृष्णबहादुर थापाले गरेका हुन् भने सम्पादन नकुल खड्काले गरेका छन्।
वसन्त सापकोटा, दीपक शर्मा र प्रकाश सपुतको संगीत रहेको फिल्मका गीतमा आशिष अविरल, समीक्षा अधिकारी, प्रकाश सपुत, मोहितवंश आचार्य, समीर खरेल र सज्जा चौलागाईंको स्वर सुन्न सकिनेछ।
